Roadtrip

Verby Slingerfontein Witput en Brandvlei
deur hotnotsnot en gousblom
verby die ouvroukind sonder taal
my bors ruk oop en span `n koepel
kantel in die aarde terug welbehaaglik
keer terug as dorper, gorra en kokerboom
die lug is puur jonggras
haar aorta klop afrika-afrika
kwesbaar soos `n vuis
upington olifantshoek rooisand en roadkill
in die mik van haar bene `n versamelnes
warm soos `n jong voëltjie
once upon a time was daar `n draadengel
en `n lug vol helder wolke
bikergirl hippie vroedvrou en hoer
vrugbaar soos `n plaasdam in die reëntyd
skaapwêreld weskusklong weer op pad
om die wêreld om haar vinger
te draai